Heydər Əliyev Sarayında bir müddətdir silsilə konsert proqramları təşkil olunur. Bayağılığı ilə seçilən, şit və ucuz musiqilərinin efrlərdən evlərimizi işğal, küçədən qulaqlarımızı kar etdiyi bir vaxtda bu cür əlçatan və çox mötəbər tədbirlərin keçirilməsi həm insanlarımızın musiqi zövqünün formalaşmasına müsbət təsir göstərir, həm də Azərbaycan söz və səs sənətinin çoxşaxəli, rəngarəngliyini nümayiş etdirir. Damaq zövqümüzü milli yeməklərimiz formalaşdırdığı kimi, müsiqi zövqümüzə də əsasən milli musiqilərimizin təsir etməsi danılmaz həqiqətdir. “Ulduzlu axşamlar” layihəsinin müəllifləri təşkil etdikləri silsilə konsertlər ilə ölkəmizdə həm də əsl musiqinin dinləyicilərinin yetərincə olduğunu sübut etdilər. Bu layihə çərçivəsində təşkil olunan konsertlərə minlərlə tamaşaçı bilet aldı, uşaqdan böyüyə muğamın sehrli dünyasına üz tutdular,dinlədilər, duyğlandılar, ruhlarını qidalandırdılar.
Bahar qoxulu bu günlərdə sözün və səsin sehrinə düşənlərdən biri də mən idim. “Beytüs Səfa” məclisinə təşrif buyuranlardan biriydim. Tamaşaçılar arasında həm izləyici idim, həm də müşahidəçi. Səhnədə xanəndələr növbəti Muğam xalısı toxuyurdular. İlmələr zəngulələrlə vurulur, çalğıçılar hər guşəni ahəngdarlıqla bir-birinə bənd edirdilər. Gecədə Şirvan muğam məktəbinin davamçıları - Xalq artistləri Mələkxanım Əyyubova, Nazpəri Dostəliyeva, Zabit Nəbizadə, Əməkdar artistlər Bəsti Sevdiyeva, Elnarə Abdullayeva, Fərqanə Qasımova, Bəyimxanım Vəliyeva, Aytən Məhərrəmova, Nigar Şabanova, xanəndələr Mütəllim Dəmirov, Abgül Mirzəliyev, Mirələm Mirələmov, Kamilə Nəbiyeva, Nisbət Sədrayeva, İlahə Rüstəmova çıxış etdilər. Onlar oxuduqca yarpızlı, lilparlı bulaqların şırıltısını eşidir, yarpaqların pıçıltısını duyur, axar sular kimi hisslərimiz, duyğularımız axıb durulurdu.
Bu gecə həm də bir çox tanıdıqlarımı bir başqa yönündən də -muğama, sözə münasibətlərinə görə tanıya bildim.Musiqi həm də bir bağ kimi minləri bir-birinə bağlaya bilmişdi. Xanəndələr oxuyur, Azərbaycan mənzərələri lövhə-lövhə göz önündən keçib gedirdi. Şirvanın yastı yolları, can Qarabağın obaları, oymaqları alqışlarla xatırlanırdı. Bu gecədə “ana yurdum Qarabağ” deyildi, Şirvana bağlı təsniflər oxundu, şikəstələr havalandı, ruhlar dalğalandı...Nazpəri xanımın Muğam kompozisiyası muğamımızın çoxrəngliliyinibir daha təsdiqlədi.Fərqanə Qasımova, Bəsti Sevdiyeva, Elnarə Abdullayevanın zəngulələri Heydər Əliyev Sarayında əks-səda verdi. Zabit Nəbizadə Şirvan gözəlləməsi ilə ulu Şirvanı tamaşaçıları ilə birgə seyrə çıxdı...Və konsertin pik nöqtəsi “Şirvan şikəstəsi” oldu desəm yanılmarıq.
Konsertin aparıcıları- tanınmış qiraət ustası Xəzər Süleymanlı və aktrisa Sabirə Abdullayeva gecə boyunca ulduzlu qonaqları təqdim etməklə yanaşı, musiqilərlə səsləşən şeirlər də səsləndirdilər. Gecə böyük anşlaqla keçdi və tamaşaçıların da zövqünü oxşadı. “Ulduzlu axşamlar”ın payına bir də sürəkli tamaşaçı alqışı düşdü.
Elton Dünyamalıoğlu
