Aprelin 3-də Naxçıvanda “Zəkaların mübarizəsi” olimpiadasının şahmat turniri istiqaməti üzrə regional mərhələsi təşkil olunub.

“İki sahil” xəbər verir ki, olimpiadada rayon, şəhər Təhsil Şöbələri üzrə hər komandada 3 oğlan, 2 qız olmaqla ümumilikdə 40 məktəbli  8 komandada  mübarizə aparıb. 

FİDE qaydaları əsasında keçirilən şahmat turnirində  Naxçıvan şəhər komandası xal hesabı ilə digər komandaları üstələyərək qalib olub.
 
Regional mərhələdə qalib olan Naxçıvan şəhər komandası paytaxt Bakıda keçiriləcək Respublika mərhələsində Naxçıvanı təmsil edəcək.
 
Məlumat üçün bildirək ki, Heydər Əliyev Fondu və Elm və Təhsil Nazirliyinin birgə layihəsi çərçivəsində may ayında IX-XI sinif şagirdləri üçün təşkil olunacaq “Zəkaların mübarizəsi” olimpiadasında məktəblilər riyaziyyat, rəqəmsal texnologiyalar, təbiət və humanitar elmlər, mədəniyyət və incəsənət sahələrində bilik və bacarıqlarını nümayiş etdirəcək, eyni zamanda şagirdlər arasında şahmat turniri təşkil ediləcək.

Qeyd edək ki, növbəti həftələrdə Naxçıvanda  olimpiadanın  bilik yarışı istiqaməti üzrə regional mərhələsi təşkil olunacaq.