Aprel döyüşlərindən 9 il ötür
2016-cı ilin 1-4 aprel tarixlərində Prezident, Ali Baş Komandan İlham Əliyevin rəhbərliyi ilə Azərbaycan Ordusu Ermənistan silahlı qüvvələrinin ardıcıl təxribatlarına cavab olaraq uğurlu əks-hücum əməliyyatı keçirdi və 1994-cü il atəşkəsindən sonra ilk dəfə düşmənə gücünü göstərdi. Əminliklə demək olar ki, Aprel döyüşləri hərb, eyni zamanda, müasir Azərbaycan tarixində misli-bərabəri olmayan şücaət salnaməsidir. Hər şeydən əvvəl ona görə ki, bu savaş 2020-ci ilin 44 günlük müharibəsindəki uğurlarımızın təməlini qoydu. Elə bu səbəbdən bu döyüşlər tarixi Zəfərə aparan yolun başlanğıcı kimi dəyərləndirilir.
Bu sözləri Aprel döyüşləri zamanı işğal altında olan bir neçə yüksəkliyin ələ keçirilməsində iştirak etmiş, elə həmin döyüşlərdə yaralanmış, II qrup Qarabağ qazisi, ehtiyatda olan baş leytenant, “Böyük Qayıdış” Gənclər Təşkilatı İctimai Birliyinin sədr müavini Əhliyət Mehdiyev “İki sahil” qəzetinə açıqlamasında söylədi.
Bildirdi ki, Aprel döyüşlərində Tərtər rayonunun Talış kəndi istiqamətindəki yüksəkliklər işğalçılardan təmizləndi: “Eyni zamanda, geniş ərazini nəzarətdə saxlamaq imkanı verən olduqca strateji əhəmiyyətli Cəbrayıl rayonu ərazisindəki Lələtəpə yüksəkliyi ordumuzun nəzarətinə keçdi. Düşmənin Suqovuşan yaşayış məntəqəsində yerləşən qərargahı dağıdıldı. Bununla da Ağdərə-Suqovuşan, Cəbrayıl istiqamətindəki yolları nəzarətdə saxlamaq imkanı əldə olundu. Ən əsası isə bu döyüşlər Ermənistanın uzun illər ərzində öz ordusu haqqında yaratdığı mifləri, ideoloji əsasları darmadağın etdi. Həm də bu döyüşlər Azərbaycan xalqı və dövlətinin heç vaxt işğalla barışmayacağını, öz ərazi bütövlüyünü nəyin bahasına olursa-olsun bərpa edəcəyini birmənalı şəkildə göstərdi”.
Müsahibimiz Aprel döyüşlər ilə bağlı Prezident İlham Əliyevin bu sözlərini xatırlatdı: “Həm peşəkarlıq, həm də vətənpərvərlik ruhu baxımından Aprel döyüşləri bir daha göstərdi ki, Azərbaycan xalqı qəhrəman xalqdır. Bir daha onu göstərdi ki, biz bu vəziyyətlə barışmayacağıq. Onu göstərdi ki, xalq-iqtidar birliyi bu gün Azərbaycanda yüksək səviyyədə təmin olunur, möhkəmlənir”. Ümumiyyətlə, Müzəffər Ali Baş Komandan İlham Əliyev 44 günlük Vətən müharibəsindən danışarkən həmişə bir qayda olaraq Aprel döyüşlərindən söz açır”.
Ə. Mehdiyevin fikrincə, uğurlu Aprel döyüşlərindən 2 il sonra Azərbaycan Ordusu daha bir böyük zəfərə imza atdı: “Əlahiddə Ümumqoşun Ordu tərəfindən Naxçıvanın Günnüt kəndi və ətraf əraziləri nəzarət altına alındı. Bütün bunlar da Azərbaycanın hərb salnaməsinə qızıl hərflərlə yazılan şanlı 44 günlük Vətən müharibəsində böyük Zəfərə gedən yolda mühüm əhəmiyyət kəsb etdi. Yəni, bu döyüşlər ordumuzun və xalqımızın böyük Qələbəyə inamını və əzmini daha da artırdı. Nəticədə Qarabağ Zəfərinin davamı olaraq 2023-cü il sentyabrın 19-20-də Azərbaycan Ordusunun apardığı bir günlük uğurlu lokal xarakterli antiterror tədbirləri nəticəsində ölkəmiz həm ərazi bütövlüyünü, həm də suverenliyini tam bərpa etdi. Bununla da Azərbaycan nəyə qadir olduğunu bir daha dünyaya göstərdi.
Aprel döyüşlərində Lələtəpədə ucaldılan üçrəngli Bayrağımız bu gün Qarabağın və Şərqi Zəngəzurun hər bir guşəsində - Cəbrayılda, Füzulidə, Zəngilanda, Qubadlıda, Kəlbəcərdə, Ağdamda, Şuşada, Hadrutda, Laçında, Əsgəranda, Xocavənddə, Ağdərədə, Xocalıda və Xankəndidə dalğalanır. Hər dəfə həmin bayraqları görəndə Aprel döyüşləri gözlərim önündə canlanır. İnandırım sizi, o qədər qürur hissi keçirirəm ki...”
Aprel döyüşlərini şanlı Zəfərimizin uvertürası kimi dəyərləndirən həmsöhbətimiz, həmçinin bildirdi ki, şübhəsiz, əldə olunan şanlı Zəfərə görə qəhrəman şəhid qardaşlarımıza, qazilərimizə, döyüşçülərimizə borcluyuq: “Həmin döyüşlərdə polkovnik-leytenant Murad Mirzəyev, mayor Samid İmanov, kapitan Mühit Orucov, polkovnik-leytenat Raquf Orucov, polkovnik Vüqar Yusifov kimi igid oğullarımız şəhidlik mərtəbəsinə yüksəldilər. Allah bütün şəhidlərimizə rəhmət eləsin. Biz əldə etdiyimiz hər bir uğurumuza görə onlara borcluyuq. Məhz onlar bu günləri bizlərə yaşatdılar. Məhz onların sayəsində bu gün biz qalib Azərbaycanın qalib vətəndaşlarıyıq”.
Ehtiyatda olan baş leytenant söhbətinin sonunda vurğuladı ki, Lələtəpə yüksəkliyinin azad edilməsi nəticəsində Cəbrayıl rayonunun Cocuq Mərcanlı kəndində mülki əhalinin yaşayışı üçün təhlükə aradan qaldırıldı və məcburi köçkünlər öz ata-baba yurdlarına qayıtmağa başladılar. Bununla da Böyük Qayıdışın təməli qoyuldu. Yeri gəlmişkən onu da qeyd edim ki, bu gün dövlətimiz “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na əsasən Qarabağ və Şərq Zəngəzurda Böyük Qayıdış prosesini həyata keçirir, işğaldan azad etdiyi ərazilərimizi cənnətə çevirir. Artıq 13 yaşayış məntəqəsində keçmiş məcburi köçkünlərimiz məskunlaşıblar. 2026-cı ilə qədər 140 min insanın Qarabağ və Zəngəzura qayıdışı planlaşdırılır. Prezidentimizin sözləri ilə desək, Qarabağın və Şərqi Zəngəzurun bərpası fantastik sürətlə gedir. Tezliklə bu ərazilər təkcə Azərbaycanda deyil, Qafqazda və bütün dünyada ən müasir, rahat və gözəl yerlərdən birinə çevriləcək. İnanıram ki, çox qısa müddətdə bütün məcburi köçkünlər öz ata baba yurduna qayıdacaq və bununla da onların yurd-yuva nisgillərinə birdəfəlik son qoyulacaq”.
Qvami Məhəbbətoğlu, “İki sahil”
