Tədqiqatçılar qrupu 30 il ərzində toplanmış 43 milyon məlumat nöqtəsini təhlil edərək, okeanlarda enerjisi istehsalı ən böyük potensiala malik əraziləri müəyyən edib.
“İki sahil” “Interesting Engineering” nəşrinə istinadla xəbər verir ki, dünya qazıntı yanacağından imtina etməyə çalışdıqca alternativ enerji mənbələrinə tələbat getdikcə artır. Lakin, Günəş və külək enerjisi dəyişkənlik problemləri ilə üzləşir: Günəş və külək olmasa istehsal dayanır.
Bunun əksinə, okean axınları yüksək sabitliyə malikdir və etibarlı bərpaolunan enerji mənbəyinə çevrilə bilər. Florida Atlantik Universitetinin (FAU) tədqiqatçıları dəniz axınlarının harada daha effektiv istifadə oluna biləcəyini müəyyən etmək üçün bu günə qədər ən böyük analiz aparıblar.
Milli Okean və Atmosfer Tədqiqatlar İdarəsinin (NOAA) Qlobal Dreyf Proqramı çərçivəsində alimlər 1250 peyk siqnal nişanlarından istifadə edərək 1988-ci ildən 2021-ci ilə qədər toplanmış məlumatları emal ediblər.
Onlar dörd regionda: Cənub-Şərqi Asiya, Cənubi Afrika, Braziliya, Fransız Qvianası və ABŞ-ın cənub-şərqində okean axınlarını tədqiq ediblər. Nəticədə okean axınlarının enerji potensialına dair bu günə qədər ən əhatəli hesabat tərtib edilib.
Məlum olub ki, Florida ştatının şərq sahilləri və Cənubi Afrika sahilləri yaxınlığındakı ərazi ən yüksək enerji sıxlığına malikdir - hər kvadrat metrə təxminən 2500 vatt. Bu, külək elektrik stansiyaları üçün əla resurs hesab ediləndən 2,5 dəfə yüksəkdir.
Florida və Cənubi Afrika liderlik edərkən, tədqiqatçılar digər perspektivli sahələri də müəyyən ediblər. Məsələn, ABŞ-ın şərq sahillərində, Şimali Karolinaya qədər, eləcə də Somali, Tanzaniya, Keniya, Madaqaskar və Cənubi Afrika sahillərində əhəmiyyətli güc (2000 Vt/m2-dən çox) müşahidə olunub.
Ümumilikdə, yüksək enerji sıxlığı olan ərazilər okean akvatoriyasının təxminən 490 min kvadrat kilometrini əhatə edir. Tədqiqat həmçinin, mövsümi dəyişiklikləri də aşkar edib: yay aylarında dayaz su ərazilərində güc səviyyəsi daha yüksəkdir.
Böyük potensialına baxmayaraq, okean axınlarının istifadə edilməsi texnologiyası geniş miqyasda həyata keçirilməsi üçün mürəkkəb və bahalı olaraq qalır. Bundan əlavə, mümkün ekoloji nəticələri nəzərə almaq lazımdır: dəniz faunasına təsir, avadanlıqların bioloji orqanizmlərlə çirklənməsi və elektromaqnit maneələr.
Lakin, tədqiqatçılar əmindirlər ki, okean enerjisi gələcəkdə bəşəriyyəti sabit və ekoloji cəhətdən təmiz enerji ilə təmin edərək qlobal enerji balansının mühüm hissəsinə çevrilə bilər.
