Avropa tənzimləyiciləri amerikalı sahibkar İlon Maska məxsus “X”ə 1 milyard dollardan çox cərimə tətbiq etmək imkanını nəzərdən keçirirlər.

“İki sahil” xəbər verir ki, bu barədə “The New York Times” (NYT) qəzeti mənbələrə istinadən bildirib.

Avropa İttifaqının (Aİ) bu yay “X”ə qarşı tədbirlər elan edəcəyi gözlənilir. NYT-nin yazdığına görə, tənzimləyicilər ümid edirlər ki, belə yüksək cərimənin tətbiqi digər şirkətləri düşünməyə vadar edəcək. Qəzetə görə, Aİ və “X”, əgər sosial şəbəkə Brüsselin tələb etdiyi dəyişikliklərlə razılaşarsa, hələ də sövdələşə bilərlər.

Bundan başqa, Aİ “X”ə qarşı daha bir təhqiqat aparır. Qeyd olunub ki, bu təhqiqat çərçivəsində sosial şəbəkə “X”in istifadəçi kontentinə müdaxilə etməməsi səbəbindən Aİ-də nifrət və dezinformasiya yayılması mərkəzi kimi qiymətləndirilir.

Aİ-də “X”ə qarşı təhqiqat 2023-cü ilin dekabrında başlayıb. Avropa Komissiyası şirkəti Rəqəmsal Xidmətlər Aktını (DSA) pozmaqda şübhəli bilir. Bu akt internet resursları operatorlarını məhkəmə qərarı olmadan Aİ-də qadağan edilmiş kimi işarələnmiş kontenti silməyə məcbur edir.