Minlərlə qeyrətli Vətən övladı birləşərək 30  il erməni   əsarətində qalan Qarabağımızı öz qanları bahasına azad etdilər. Azərbaycanın yeni, şanlı tarixini yazan, bu ölməzliyə qovuşan Vətən sevdalıları  xalqın qəlbində yaşamaqla, daim  böyük məhəbbətlə, ehtiramla yad olunurlar. Məhz  Masallı Tarix-Diyarşünaslıq Muzeyi və Masallı Dövlət Regional Kollecinin birgə əməkdaşlığı  sayəsində baş tutan  “Şəhidlər Vətənin zəfər rəmzidir “ başlıqlı layihənin  növbəti tədbiri  də doğma Azərbaycanın hər qarışını canından əziz tutan mərd igidlərə həsr olunmuşdu.

Muzeydə  Birinci Qarabağ və Vətən müharibəsi zamanı şəhid olanların yad edilməsi  məqsədilə  təşkil olunan  tədbirə təşkilatçı müəssisələrin əməkdaşları, şəhid yaxınları, veteranlar, qazi və tələbələr qatılmışdı . Əvvəlcə  Vətənin azadlığı, bütövlüyü və suverenliyi uğrunda canından keçən bütün şəhidlərin əziz xatirəsi bir dəqiqəlik sükutla  anıldı .

Layihənin məqsədini açıqlayan muzeyin direktoru Əntiqə Tağıyeva  fevral ayında anım günləri olan, Qarabağ ərazisində döyüşlərdə hünər göstərib şəhidlik zirvəsinə ucalan, əbədi günəş ömrü yaşayan  Masallı gəncləri haqqında geniş məlumat verdi.

Digər çıxışçılar- Qarabağ Müharibəsi Əlillər, Veteranlar və Şəhid Ailələri İctimai birliyin Masallı rayon filialının sədri Nahid Rəhimov , Birinci Qarabağ veteranı Nicat Qurbanov və şəhid qardaşı Sahil Səfərov tədbirin əhəmiyyətindən   söz açdılar, onu da   bildiriblər ki,  xalqımızın şəhidlərə olan ehtiramı böyükdür.   Hər şəhidin  qəlblərdə əbədiyyətə çevrilən adını gələcək nəsillərə bir miras olaraq saxlamaq olduqca müqəddəs bir işdir. Azərbaycanın bütövlüyü və torpaqlarının düşmən tapdağından azad edilməsi  zamanı döyüşdə şəhidlik zirvəsinə ucalanların yolu gənclər üçün yaxşı örnəkdir.

Masallı Dövlət Regional Kollecin direktor müavini Dilarə Hüseynova isə tədbirin  yekun çıxışında dedi:-  Uzun illərdən sonra  Vətən torpaqları uğrunda şəhid olanların qisası 44 günlük haqq savaşında  reallığa çevrildi.  Şəhidlərin qanı bahasına  qazanılmış möhtəşəm qələbədə Ermənistanın işğalı altında olan əzəli yurd yerimiz  Qarabağın azad olunması ilə  ölkəmizin ərazi bütövlüyü bərpa edildi, Azərbaycanın çoxəsrlik dövlətçilik tarixinin ən şərəfli səhifəsi yazıldı.

Zəfər Orucoğlu,
Azərbaycan Jurnalistlər Birliyinin üzvü