Serb Respublikasının (Bosniya və Herseqovinanın tərkibindəki qurum) Prezidenti Milorad Dodikin və daha iki siyasətçinin Almaniya və Avstriyaya girişi qadağan ediləcək.

“İki sahil” Gazeta.ru-ya istinadla xəbər verir ki, bu barədə Avstriya xarici işlər naziri Beate Maynl-Raytsingerin və Almaniya Xarici İşlər Nazirliyinin Avropa və İqlim məsələləri üzrə dövlət naziri vəzifəsini icra edən Anna Lürmannın bəyanatında deyilir.

Bəyanatda Bosniya və Herseqovinadakı konstitusiya böhranına diqqət çəkilərək, buna görə məsuliyyət daşıyanlara qarşı təcili əlavə tədbirlər görülməsi barədə razılıq əldə olunub.

Onların fikrincə, M.Dodik "qırmızı xətlər"i keçib, Balkan ölkəsinin təhlükəsizliyini, sabitliyini, konstitusiya quruluşunu və ərazi bütövlüyünü təhdid edir.