Avroparlamentarilər separatçıların müdafiəsində

Vəzifəsi ədaləti, insan hüquqlarını qorumaq olan Avropa Parlamentinin Azərbaycana qarşı ikili standartlar siyasəti barədə saysız faktlar var. Ermənistanın ərazilərimizi işğal altında saxladığı otuz il müddətində ağzına su alıb səsini çıxarmayan bu qurumun əksər üzvləri Qələbəmizdən sonra canfəşanlıqla təcavüzkarın müdafiəsinə qalxıblar. Belə qənaətə gəlmək olur ki, bunlar dolayısı ilı Ermənistanla əlbir, dilbirdirlər. Dədə-baba torpağımızı azad etməyimiz nədənsə bunlara çöçin gəlir. “Niyəsi” məlumdur: Xristian təəssübkeşliyi.  Bir sıra Avropa dövlətlərinin və beynəlxalq təşkilatların Azərbaycana təzyiqləri yadımıza səlib yürüşlərini salır. Sadəcə, müasir səlibçilər türk-müsəlman dövlətlərinin əl-qolunu siyasi qərarlarla, qətnamələrlə,  qadağalarla və ikili standartlarla bağlamağa, özlərindən asılı vəziyyətə salmağa cəhd edirlər.

“Avropa Parlamenti Azərbaycanın daxili hüquqi məsələlərinə qarışmağa cəhd etməzdən əvvəl öz köklü korrupsiya problemlərinin həllinə və ona münasibətdə zədələnmiş ictimai etimadın bərpasına diqqət yetirməlidir. Avropa Parlamentinin üzvləri eqoist siyasi oyunlar əvəzinə əsl həqiqəti, ədaləti və sülh prinsiplərini rəhbər tutmalıdırlar.”

 Dona Qrasiya Diplomatiya Mərkəzinin təsisçisi və baş direktoru, tanınmış jurnalist, siyasi şərhçi Reyçel Avraham Kanadanın populyar “THEJ.CA” nəşrində dərc olunmuş məqaləsində belə yazıb. “Azərbaycanın ədalət hüququ: Avropa Parlamentinin erməni məhbuslarla bağlı ikili standartları” başlıqlı məqalədə Azərbaycanın erməni məhbuslarını törətdikləri hərbi cinayətlərə görə mühakimə etdiyi bir vaxtda Avropa Parlamenti özünün korrupsiya qalmaqallarına və qərəzli müdaxilələrinə məhəl qoymadığı qeyd olunub. Əksinə, adıçəkilən qurumun Azərbaycanın İkinci Qarabağ müharibəsi zamanı əsir düşmüş Ermənistan vətəndaşlarının həbsdə saxlanması və işgəncələr verilməsi ilə bağlı absurd müzakirələrə rəvac verdiyi yazılıb. Belə ki Avropa Parlamentindəki erməni lobbisi əndazəsiz şəkildə təhrif olunmuş versiyanı irəli sürərək Qarabağ separatçılarını günahsız qurbanlar kimi qələmə verir. Halbuki dediyimiz kimi, həbbs olunmuş şəxslər Azərbaycanda insanlıqdan uzaq işgəncə, muzdlu fəaliyyət, hərbi cinayətlər, separatizm, terrorizm əməlləri və terrorizmin maliyyələşdirilməsi – Azərbaycan Cinayət Məcəlləsinin əhatə etdiyi digər cinayətlər də daxil olmaqla ağır cinayət ittihamları ilə təqsirləndirilirlər.

Müəllif Avropa Parlamentinin bu yaxınlarda qəbul etdiyi "Erməni girovların qanunsuz tutulması və qondarma məhkəmə prosesləri" adlı qətnaməni Azərbaycanın Qərb ictimaiyyətində reputasiyasını zədələmək niyyəti daşıyan kampaniyanın tərkib hissəsi saymaqla əsassız, qeyri-obyektiv və qərəzli sənəd kimi səciyyələndirib. Keçmiş təcrübəyə istinad edərək Avropa Parlamentinin Azərbaycana qarşı düşmən mövqeyindən təəccüblənmədiyini vurğulayan siyasi şərhçi sözügedən addımı erməni maraqlarının Avropa təsisatları hesabına təmin edilməsinin növbəti nümunəsi kimi dəyərləndirib. O, oxşar tendensiyaların Avropa Şurası Parlament Assambleyası və Avropa İnsan Haqları Məhkəməsi də daxil olmaqla digər Avropa təsisatlarında da müşahidə olunduğuna diqqət çəkib.

Yazıda bildirilib ki, ağır dövləti cinayətlərdə təqsirləndirilən şəxslərin Bakıda davam edən məhkəmə prosesi Azərbaycanın daxili hüquqi məsələsidir və burada hər hansı kənar müdaxilə əsassız  olmaqla qəbuledilməzdir. Avropalı deputatlar indi atılıb-düşməkdənsə vaxtında Qarabağda yuva salmış separatçıları düz yola dəvət edəydilər, qonşu ölkənin ərazisinin işğalının yolverilməz ağır cinayət olduğunu anladaydılar. Etmədilər. Çünki düşünürdülər ki, boş danışıqlarla vaxtı sonsuza qədər uzadacaq, azərbaycanlılara torpaq itkisini unutduracaqlar. ATƏT-in bədnam Minsk qrupunun həmsədrliyinə Türkiyənin buraxılmaması da bu məqsədlə edilmişdi. Ancaq bərk yanıldılar. Haqq-ədalət onlarsız da öz yerini tutdu, Azərbaycan Ordusu 44 gün ərzində torpaqları azad etdi, işğala rəvac verənlər isə, necə deyərlər, soyuqsaqqal oldular.

Onu da deyək ki, nüfuzunu itirmiş Avropa Parlamentindən narazı qalan təkcə Azərbaycan deyil. Başqa dövlətlər də var. Məsələn, İsrail də vaxtaşırı Avropa Parlamentinin ədalətsiz davranışına tuş gəlib. Oxucuların diqqətini çəkən məqalədə qeyd olunub ki, bu beynəlxalq qurumun bəzi üzvlərinin Azərbaycana qarşı mənfur davranışları gələcək nəsillər qarşısında cavabdehlik yaradır. Hüquqa söykənən ədalətli yanaşma budur ki, Azərbaycan onun ərazisində cinayət törətmiş erməni əsilli şəxsləri mühakimə etmək kimi suveren hüquqa sahibdir və Avropa xalqları Cənubi Qafqazda baş verənlərlə bağlı həqiqəti bilməlidirlər. Avroparlamentarilər isə həqiqətdən cin misdən qorxan kimi qorxurlar. Çünki həqiqət üzə çıxarsa o zaman onun arxasından korrupsiyaya batmış əlləri və qana bulaşmış sifətləri açıq görünər.

Vəli İlyasov, “İki sahil”